Ceos moi anubrados ou cubertos, con chuvias persistentes e puntualmente moderadas, principalmente en puntos da metade oeste, que se estenderán a toda a Comunidade co transcurso da tarde.

Temperatura mínima sen cambios ou en lixeiro descenso e máximas en descenso moderado en conxunto, con descensos notables puntuais.

Vento do sur ou sudoeste durante a mañá, moderado en xeral, con refachos fortes no litoral da Coruña, e do oeste a partir da tarde, máis feble canto máis avanzada estea.

O luns quedaremos baixo a influencia dunha borrasca cunha fronte fría activa asociada, polo que o tempo cambiará de xeito radical. Os ceos cubriranse e as chuvias caerán de xeito persistente e puntualmente moderado, fundamentalmente en puntos da metade oeste, estendéndose a partir da tarde a toda a Comunidade. As temperaturas nocturnas non variarán ou descenderán lixeiramente, mentres que as diúrnas descenderán de xeito moderado ou notable. Os ventos tamén serán salientables; soprarán do sur ou sudoeste durante a mañá, moderados en xeral, con refachos fortes no litoral da Coruña, e rolarán a oeste e amainarán segundo avance a tarde.