Moitos salóns de bronceado empregaban antigamente aparatos que emitían UV B que causaban facilmente queimaduras. Por iso, os salóns actuais soen empregar dispositivos que emiten principalmente (pero non só) UV A e que son ofrecidos coma "seguros" dado o menor risco de queimadura, xa que antigamente se consideraban os UV A coma pouco nocivos en comparación ós UV B. Sen embargo, os estudios actuais mostran que a radiación UV A causa importantes danos cutáneos, como temos visto, e que pode estar ligada á forma máis seria de cancro cutáneo, o melanoma.

Por outra parte, a radiación UV A emitida por un aparato de solario por unidade de tempo é moito máis intensa que a luz solar natural. Así, 20 minutos nun solario equivale a aproximadamente 4 horas de sol.

Conscientes do risco, recentemente as Administracións Públicas estableceron un conxunto de normas de obrigado cumprimento. Como resultado, estes dispositivos sempre deben utilizarse en establecementos profesionais que coñezan e cumpran as normas establecidas pola lexislación vixente. Esixa o cumprimento de ditas normas, pola súa saúde.